Forcat RENEA kanë kryer kontrolle në disa banesa në Shijak, edhe në kuadër të operacionit “Porositësi”, i cili pak ditë më parë shkatërroi një grup kriminal me 15 persona të akuzuar për vrasje. Mediat shkruajnë se kontrollet mund të jenë rezultat edhe i kërkimeve për Ervis Martinajn, i cili prej 9 gushtit rezulton i zhdukur, por ende nuk ka një konfirmim nga autoritetet.
Burimet jo zyrtare bëjnë me dije se Forcat Speciale RENEA kanë ushtruar kontrolle në Shijak gjatë mbrëmjes së djeshme. Aksioni vijon edhe paraditen e sotme. Kontrollet po zhvillohen në vende ku dyshohet se mund të jenë të dyshuar me precedentë kriminalë, por ende nuk ka një njoftim zyrtar.
Ervis Martinaj ishte shpallur në kërkim, në kuadër të operacionit “Plumbi i Artë”, pasi i penduari i drejtësisë Nuredin Dumani, tha se i kishte ofruar një ‘çek të bardhë’ në këmbim të ‘kokës’ së Indrit Dokles. Por, në 9 gusht, ai u zhduk pa gjurmë. Alarmin e ngritën familjarët e Martinajt dhe tashmë prokuroria po heton për rrëmbim personi dhe inskenim.
