Kryesekretarja e Gjykatës së Lezhës, Klaudia Marku, është larguar nga banesa e saj, ku dhe ka humbur kontaktet me familjarët e saj. Denoncimi është bërë në polici nga bashkëshorti i saj, duke i vënë menjëherë në lëvizje.
Paraprakisht dyshohet se gruaja është larguar për shkak të konflikteve familjare, por nuk përjashtohen as pistat e tjera. Nga informacionet e para bëhet e ditur se Klaudia Marku nuk ka patur probleme te mëparshme, denoncime apo kërcënime.
Njoftimi i policisë
Më datë 06.04.2022, rreth orës 23:00, ka njoftuar sallën operative të Drejtorisë Vendore të Policisë Lezhë dhe më pas ka bërë kallëzim në Komisariatin e Policisë Lezhë, shtetasi O. M., 38 vjeç, banues në Lezhë, për largimin nga banesa, të bashkëshortes së tij, shtetases K. M., 34 vjeçe.
Menjëherë, pas administrimit të kallëzimit, është bërë shpallja e kërkimit policor e kësaj shtetaseje dhe vijon puna për gjetjen e saj.
Gjithashtu, nga ana e Prokurorisë së Rrethit Gjyqësor Lezhë është regjistruar procedimi penal për këtë rast dhe nën drejtimin e Prokurorisë po kryhen veprime hetimore intensive, për sqarimin e rrethanave dhe motiveve të largimit nga banesa.
