Ish-gazetari italian David-Maria Sassoli është zgjedhur presidenti i ri i Parlamentit Europian. Në raundin e dytë të votimit në Strasbourg 63-vjeçari mori mbështetjen e 345 deputetëve nga 667 që janë gjithsej.
Politikani i qendrës së majtë fitoi ndaj 3 kandidatëve të tjerë dhe menjëherë do të marr rolin e kryetarit të asamblesë.
Gjatë një fjalimi pas rezultatit të së mërkurës, Sassoli tha se unioni është “i papërsosur” dhe ka nevojë për reforma. Duke shtuar se BE duhet të rikthejë shpirtin për të cilin është krijuar. Një bashkim që arriti të transformojë luftën dhe nacionalizmin në paqe dhe barazi. Në fjalën e tij ai theksoi veçanërisht nevojën për reforma mbi personat që kërkojnë azil në Europë.
“Ne duhet të fuqizojmë kapacitetin tonë për të luajtur një rol udhëheqës për demokracinë. Ju nuk mund të vazhdoni ta zmbrapsni këtë rrugë. Ne nuk duam që njerëzit të pyesin “ku është Evropa” çdo herë që ndodh një emergjencë”.
Votimi erdhi një ditë pasi liderët e BE-së ranë dakord për nominimet për vendet më të larta të bllokut. Dhe për herë të parë në pozicionin e presidentit të Komisionit Europian u propozua një grua. Kështu Jean-Claude Juncker pritet të zëvendësohet nga Ministrja gjermane e Mbrojtjes Ursula von der Leyen./ Burimi: BBC, Përshtati: TIRANA TODAY
