Qeveria ka vendosur të tjera lehtësira për qytetarët, duke zgjeruar hartën e zonave të gjelbra. Po kështu, nga sot do të nisë shërbimi taksi ndërqytetës.
Harta e qyteteve të gjelbra është zgjeruar. Por sipas udhëzimeve të Ministrisë së Shëndetësisë, qytetarët duhet të tregohen të kujdesshëm me përdorimin e masave.
Nga 4 maji vendit i janë shtuar edhe 18 zona të tjera të gjelbra, konkretisht; Tropojë, Rrogozhinë, Peqin, Belsh, Cërrik, Gramsh, Ura Vajgurore, Kuçovë, Berat, Poliçan, Skrapar, Devoll, Pustec, Maliq, Mallakastër, Kolonjë, Vlorë, Selenicë.
Zonat e gjelbra do të kenë të njëjtat rregulla të lëvizjes dhe fashave orare tashmë të përcaktuara për këto zona. Sipas këtyre rregullave, pensionistët në këto zona mund të lëvizin nga ora 6:00 deri në 8:30 të mëngjesit, ndërsa qytetarët e tjetë mund të lëvizin nga ora 9:30 deri në 17:30 të shoqëruar jo më shumë se një person.
Vlen të theksohet po kështu se nga sot, do të lejohen dy pasagjerë familjarë në shërbimin taksi. Shërbimi taksi do të lejohet në të gjithë territorin, duke zbatuar protokollin e sigurisë me deri në dy pasagjerë, anëtarë të së njëjtës familje për udhëtimet ndërqytetëse.
Një ditë më parë, kryeministri Rama shpërndau një video në rrjetet sociale, ku shfaqet kryeqyteti i mbushur me prindër me fëmijë. Sipas Ramës, deri më tani kemi një bilanc pozitiv në këtë luftë, dhe duhet të vazhdojmë kështu. Ai premton se do të vijohet me lehtësime të vazhdueshme, e ndërsa mbetet meraku i madh i sjelljes individuale.
