Përfaqësuesi i PD-së në tryezën për Reformën Zgjedhore Oerd Bylykbashi, pas mbledhjes së sotme, hodhi akuza ndaj mazhorancës.
Bylykbashi theksoi se mazhoranca nuk mbështet futjen e identifikimit biometrik në të gjitha qendrat e votimit.
“U diskutua një nga çështjet më të rëndësishme që ka parashtruar opozita. U hap debati në lidhje me votimin elektronik dhe identifikimin biometrik.
Për fat të keq, për ne doli sot e qartë qëndrimi i mazhorancës që nuk është e gatshme të ecë në këtë drejtim, të fusë identifikimin biometrik në të gjitha qendrat e votimit.
Në mënyrë që të mos ketë votim në emër të emigrantëve që nuk kanë ardhur asnjëherë në Shqipëri, të mos ketë votim familjar dhe të mos votohet me karta të falsifikuara.
Ne presim që nesër në 11:00 mazhoranca të vijë me një propozim, ku të jetë i qartë identifikimi biometrik në të gjitha qendrat e votimit.
Ky të jetë një detyrim për KQZ dhe qeverinë, në mënyrë që shqiptarëve të mos u manipulohen zgjedhjet”, tha ai.
