Pas humbjes së thellë në zgjedhjet e 25 qershorit, shumë demokratë ia “vunë gishtin” Lulzim Bashës, si fajtor të rezultatit të dobët.
Kështu, shumë politikanë kërkuan publikisht dorëheqjen e tij nga kreu i PD-së, por Basha bëri një hap të ndërmjetëm, mes pranimit të përgjegjësive, por edhe rikonkurrimit, duke ngrirë kompetencat e tij deri në zgjedhjet e 22 korrikut.
Menjëherë nisi shpallja e kandidaturave, për të arritur si përfundim me përballjen e Eduard Selamit dhe Lulzim Bashës.
Një tjetër kandidat ishte Astrit Patozi, i cili fillimisht tha se do të garonte për të marrë postin e kreut të PD-së, si zgjidhjen e vetme për të shpëtuar partinë, por ai u përjashtua si kandidat pas mbledhjes së Kryesisë së PD-së, duke nxjerrë “jashtë lojë” një nga figurat më të forta përballë Bashës.
Tirana Today bëri një sondazh, ku pyeti qytetarët se kush mendonin se do të jetë kryetari i ri i PD-së. Edhe pse jo një kandidat zyrtar, ne futëm si opsion në sondazh edhe Astrit Patozin, si një kandidat i pavarur, teksa duket thënë se mbështetet nga shumë demokratë, gjë që e ka dëshmuar edhe rezultati i sondazhit.
Kështu, 219 persona kanë votuar në këtë sondazh, ku vihet re një diferencë e ngushtë, thuajse e pavlefshme e Selamit me Bashën, ku ky i pari ka marrë 2 vota më shumë.
Konkretisht, 84 persona kanë votuar për Eduard Selamin si kryetar të ri të PD-së, ndërsa 82 persona kanë votuar Lulzim Bashën.
Ndërkohë, ka nga ata demokratë që nuk shohin asnjë prej tyre si personin e duhur për të marrë postin e kreut të Partisë Demokratike.
Konkretisht, nga 219 votues, 53 prej tyre mendojnë se Astrit Patozi duhet të jetë në krye të PD-së.
Duke parë rezultatet e këtij sondazhi, duhet thënë se shumica e qytetarëve janë të pakënaqur me drejtimin e Lulzim Bashës dhe e shohin si të nevojshëm largimin e tij nga kreu i Partisë Demokratike.
Sigurisht, ka nga ata që mendojnë se i duhet dhënë një tjetër shans Bashës, ndoshta edhe duke mos pëlqyer kandidaturat e tjera.
Të tjerë qytetarë kërkojnë një rikthim të “PD-së së vjetër”, me grupin Patozi-Bregu-Topalli.
Gjithsesi, duhet thënë se pavarësisht këtyre tre grupimeve të përçara të demokratëve, zgjedhjet që do të zhvillohen nesër janë më tepër fiktive, se zgjedhje reale.
Pas “pastrimit” të PD-së nga figurat e vjetra, Basha duket se ka siguruar shumicën e votave për t’u rizgjedhur kryetar i kësaj partie. Sigurisht, këtu peshon edhe mbështetja e Berishës, i cili ka zgjedhur të heshtë, por që heshtja e tij dëshmon se ai futet te grupimi i atyre demokratëve që duhet t’i rijapin një shans Lulzim Bashës.
Kjo garë të kujton garën e zhvilluar mes Olldashit dhe Bashës, ku ky i fundit kishte sërish mbështetjen e Berishës, gjë që ndikoi drejtpërdrejt në zgjedhjen e tij në krye të PD-së.
E njëjta gjë duket se do ndodhë edhe nesër, teksa vetë Patozi, por edhe Selami i cili kandidon në këtë garë, janë shprehur se këto zgjedhje janë jo të barabarta dhe jo të vlefshme./ Punoi: Safete Neza, Tirana Today
