Policia e Shkodrës çon në Prokurori kryetarin e Partisë Social Demokrate për qarkun Shkodër, Përparim Zeqir Raboshta. Në zyrat e PSD-së po shpërndaheshin 70 pako në qese plastmasi, me vaj, sheqer, miell, sapunë e detergjentë në këmbim të blerjes së votave.
Dosja është dorëzuar më 23 qershor dhe materialet janë referuar dhe për Saimir Ndokë Gjonpalaj, banues në Shkodër.
Gjithashtu, është parandaluar një tjetër shkelje, fotografimi i votës. Mësohet se në Elbasan, në disa zyra elektorale të PDIU janë shpërndarë ora dore për persona që do të qëndrojnë pranë qendrave të votimit, me qëllim fotografimin e votës.
Burime nga policia kanë identifikuar disa persona, por edhe drejtues te PDIU-së Elbasan. Konkretisht, shtetasi me inicialet K.M është personi i vendosur në hetim edhe për dy çështje të tjera të korrupsionit elektoral.
