Pas Skënder Bruçajt, tërhiqet një tjetër kandidat për garën e kreut të Komunitetit Mysliman Shqiptar. Myftiu i Kukësit, Islam Hoxha është tërhequr nga gara ditën e sotme, pikërisht kur do të zhvillohet edhe procesi i votimit.
Nuk dihen ende arsyet e tërheqjes nga gara të myftiut Hoxha, ndërsa tashmë në garë mbeten vetëm 3 kandidatë për kreun e KMSH-së, të cilët janë: myftiu i Tiranës Ylli Gurra, myftiu i Lushnjes Gramoz Vlliku dhe nënkryetar i KMSH, Bujar Spahiu.
Procedura e votimit:
Mësohet se 87 persona do të marrin pjesë në votim. Pas votimit, kandidati fitues duhet të marrë të paktën 2/3 e votave. Nëse asnjë nga këta kandidatë nuk i merr 2/3 e votave, atëherë do të rikandidojnë dy kandidatët që kanë marrë më shumë vota. Në fund, shpallet fitues mes dy kandidatëve, personi që ka marrë shumicën e votave.
