Kur situata politike ka hyrë në një rrugë pa krye, pasi opozita do të bojkotojë zgjedhjet vendore të 7 majit për bashkinë e Kavajës dhe atë ditë do ta shndërrojë në një protestë masive të mosbindjes civile, përflitet se kandidati i Partisë Socialiste për Kavajën, Klodian Shehi mund të tërhiqet nga gara.
Sipas burimeve për “Tirana Today”, theksohet se kandidati i Partisë Socialiste, Klodian Shehi, që garon përballë kandidatit tjetër të pavarur Astrit Haka, mund të tërhiqet nga gara në shenjë revolte ndaj mosbindjes civile që ka paralajmëruar opozita ditën e zgjedhjeve.
Në këtë mënyrë, duket se mazhoranca po kërkon të shmangë një përplasje të dhunshme midis mbështetësve të saj dhe atyre të Partisë Demokratike.
Pavarësisht prezantimit, që kryeministri Edi Rama i bëri para pak ditësh kandidatit Shehi në sheshin qendror të qytetit dhe takimeve që vet ai po zhvillon me qytetarët e Kavajës, të gjitha këto duket se nuk do të vlejnë për zgjedhjet e 7 majit.
Zgjedhjet për kreun e Bashkisë së Kavajës mund të shtyhen pas atyre parlamentare, të cilat rrezikohen të mos mbahen më datë 18 qershor, pasi opozita ka vendosur, gjithashtu, t’i bojkotojë.
Posti i kreut të bashkisë së Kavajës mbeti vakant që pas shkarkimit të Elvis Rroshit për shkak të së shkuarës së tij me precedentë penalë. Ndërsa mund të mbetet bosh edhe pas 7 majit, kur opozita do të bllokojë të gjithë procesin, ditën e zgjedhjeve dhe kur kandidati i Partisë Socialiste mund të tërhiqet nga gara.
Tirana Today
