Në Greqi janë mbajtur sot zgjedhjet e parakohshme parlamentare, votimet të cilat sapo janë mbyllur zyrtarisht. Sipas sondazheve paraprake, partia opozitare ‘Demokracia e Re’, parashikohet që të fitojë 38-42% të votave, ndërkohë që partia e kryeministrit Tsipras, Syriza ka një rënie drastike dhe parashikohet që të marrë 26.5-31.5% të votave.
Duket se Syriza ka pësuar një humbje të madhe pas zgjedhjeve në Parlamentin Europian, në fund të muajit maj.
Mediat greke kanë raportuar se të drejtën e votës e kanë ushtruar edhe 150 mijë shqiptarë.
Votimet e së dielës ndodhin në një periudhë kur vendi po rimëkëmbet nga një krizë e rëndë financiare, që shkaktoi shkallë të lartë të papunësisë e varfërisë.
Mbijetesa e saj varej deri në verën e kaluar nga programet ndërkombëtare të shpëtimit, dhe Greqia u detyrua të kryente reforma të thella, përfshirë shkurtimet masive të shpenzimeve dhe rritjen e taksave, për t’u kualifikuar për kreditë e shpëtimit.
