“Dy gishtat” e ngritur lart, një simbol identifikues i partisë Demokratike, është huazuar kësaj radhe nga Erion Veliaj në kuadër të fushatës së tij elektorale.
Në daljen e tij sot nëpër pikat e caktuara, ku po zhvillohen evenimente të ndryshme për fëmijët, siç duket edhe në foto kryebashkiaku Veliaj ka pozuar me 2 gishtat e ngritur lart.
Por jo vetëm kaq, pasi edhe në bluzën që ai mbante veshur, ishte stampuar numri 2. Kjo nuk është një zgjedhje e rastësishme, pasi numri 2 është vendosur të jetë si numri i tij identifikues në fletët e votimit.
Shorti për hedhjen e numrave për kandidatët, për kryetar bashkie është hedhur pak ditë më parë nga Komisioni Qendror i Zgjedhjeve, ku siç u bë tashmë e ditur kryebashkiaku Veliaj, do të rikandidojë për postin nën numrin 2 në fletët e votimit.
Rasti i ‘dy gishtave lart’ nuk është hera e parë që ndodh, pasi edhe në zgjedhjet vendore të dy viteve më parë, Edi Rama bëri të njëjtën gjë duke bërë simbolin e dy gishtave lart, pjesë të garës së tij për kryeministër.
