Komisioni Qendror i Zgjedhjeve ka pezulluar procedurën e tenderit për prodhimin e fletëve të votimit.
“News24” raporton se procedura në fjalë u pezullua, pas ankimimit që bëri pranë Komisionit të Prokurimit Publik, një nga kompanitë pjesëmarrëse në garë, ndërsa konfirmohet edhe në faqen zyrtare të Komisionit të Prokurimit Publik.
Ankimi i publikuar lidhet me prodhimin e fletëve të votimi dhe maska (shabllone) për votuesit e verbër, për zgjedhjet e organeve të qeverisjes vendore 2019, por në publikim nuk jepen detaje mbi arsyet e ankimimi.
Ankesa ka pezulluar për momentin procedurën e tenderimit dhe për pasojë procesin e prodhimit të fletëve të votimit të 30 qershorit.
KQZ sqaron se pezullimi i procesit nuk ka lidhje me situatën e tensionuar politike në vend, ndërkohë afati i fundit për regjistrimin e partive politike në zgjedhje është data 21 prill, por meqenëse e diela dhe e hëna janë zyrtarisht ditë pushimi, afati i fundit është zhvendosur të martën.
