Ministri i Diasporës, Pandeli Majko deklaroi se vota në Shqipëri është blerë 50 euro, por për shkak të “përplasjes së egër” ka vajtur edhe në 100 euro.
I ftuar në emisionin “Top Talk”, Majko foli edhe për “të fortët e PS” që dolën në përgjimet e gazetës gjermane “Bild”, duke theksuar se kjo sjellje ka ardhur si kundër-reagim.
“Ti mendon se në Shqipëri njerëzit nuk e dinë se sa herë është shitur vota, sa herë blerë vota dhe sa herë është vjedhur vota?!
“E kemi thënë dhe ka patur zona, mesatarja ka qenë 50 euro, por për shkak të përplasjes së egër ka vajtur edhe në 100 euro. Dhe e dinin të gjithë. Dikush thotë se “si ka mundësi që PS-së i vajtën disa të fortë?”, sepse ishin disa të fortë që vinin dhe rrëmbenin kutinë e votimit, na rrihnin komisionerët, nuk po flas për ’96-ën, por për më vonë. Si rezultat i forcës, si rezultat i vjedhjes, si rezultat i egërsisë, çdo aksion ka një kundër aksion. Nuk filloi historia e Shqipërisë në këto dy zgjedhjet e fundit. Zgjedhjet janë blerë në Shqipëri. Turpi më i madh është të ulërasë për vjedhje hajduti”, tha Majko.
