Lulja zemërpikon, që ka marrë emrin nga forma e saj tipike, është shembulli më i mirë i bimëve apo luleve që reflektojnë vlerat dhe karakteristikat e tyre. Kjo lule ka formën e zemrës, në pjesën e poshtme të së cilës varet një pikë loti. Kjo lule zemërthyer në fakt është më e komplikuar. Po ta shikosh nga afër do të shikosh që të gjitha këto lule formojnë një gjerdan zemrash që lotojnë.
Esenca e lules zemërpikon është karakteristike. Nëse ju kanë braktisur dhe ju duket sikur zemra do t’ju dalë nga kraharori, atëherë duhet të dini që kjo esencë e bën mungesën më të lehtë për ju. Esenca e kësaj luleje ndihmon në shërimin e trishtimit të zemrës kur ndahesh nga dikush fizikisht apo shpirtërisht. Shërimi është i menjëhershëm sa duket sikur kjo esencë e kësaj luleje të ndihmon të shpëtosh nga kthetrat e trishtimit menjëherë.
Studimet tregojnë se ngrënia e kërcellit të lules së freskët ka një efekt euforik në tru dhe largon tensionin nervor. Ajo të mpin gjithë gojën dhe po të konsumohet me tepricë edhe kalon në nivele të dëmshme. Megjithatë konsumi i saj është i rrallë pasi funksionet e saj kryesore gjatë kohëve të fundit kanë karakter dekorativ.
Lulja zemërpikon ndihmon në sjelljen e paqes, harmonisë dhe ekuilibrit në zemrën e një njeriu duke e bërë atë më të hapur në botëkuptim për veten, të tjerët, qytetin, vendin, mjedisin e përtej. Nëse lule të tjera kanë simbolika disi të çorientuara, lulja zemërpikon është një lule guximtare dhe dramatike. Ajo ka shumë emra, por të gjithë emrat shpjegojnë të njëjtën gjë. Nëse e gjeni në një buqetë me lule, në një kopsht ose në dorën e dikujt e keni të qartë menjëherë simbolikën dhe domethënien e saj.
Çfarë nënkuptimi ka lulja zemërpikon?
Kjo lule e bukur ka disa kuptime të cilat do t’ju pëlqejnë shumë
-Shprehjen e emocioneve në mënyrë më të hapur
-Dashurinë pasionante mes dy njerëzve
-Ajo nënkupton ndjeshmërinë dhe ngarkesën emocionale ndaj botës që të rrethon
-Ndjenjë mirësie dhe dashurie pa kushte për gjithçka që ke në jetë
-Lidhje të fortë që shkon përtej jetës dhe vdekjes
ulja zemërpikon është rritur e lirë për mijëra vjet me radhë në mbarë Azinë. Kjo lule nisi të kultivohej në Evropë vetëm në vitet 1800, dhe prej asaj kohe mesazhet dhe domethëniet e kësaj luleje bukuroshe ishin shumë më të përqendruara tek dashuria dhe lidhjet shpirtërore. Shumë vite më parë, disa qytetërime të lashta kanë përdorur lulen zemërpikon për të shëruar dhimbjet e dhëmbit, ose edhe disa sëmundje si sifilizi, etj.
Domethënia e formës dhe ngjyrave të lules zemërpikon
Lulja zemërpikon mban emrin botanik Dicentra spectabilis ose që përkthehet ndryshe Zemrat Spektakolare, një emër i denjë për një lule të cilës nuk ia ndan dot sytë. Shumica e këtyre luleve janë në ngjyrë rozë ose të kuqe, që i bën ato lule romantike. Ajo kryesisht dhurohet si simbol të dashurisë së vërtetë. Për më tepër, kjo lule përfaqëson njerëzit që janë të aftë të ndajnë emocionet e tyre lirisht dhe që e falin zemrën tek njerëzit që duan.
Në botë, gjendet edhe një variant i bardhë i lules zemërpikon që konsiderohet simbol i pastërtisë dhe pafajësisë së përjetshme./AgroWeb.org/
