José Marcelo Ferreira, i njohur ndryshe si Ze Maria është zyrtarisht trajneri i ri i Tiranës. Ai u prezantua nga presidenti Refik Halili.
43-vjeçari brazilian theksoi se Tirana nën drejtimin e tij do të prodhojë rezultate pozitive.
“Kur m’u bë ftesa, nuk hezitova për ta pranuar. Pavarësisht vështirësive që ka kaluar sezonin që sapo u mbyll, jam i sgurtë që e ardhmja do të jetë brilante”, thekson trajneri i ri.
Ze Maria, që vjen në Shqipëri pas një eksperience në Kenia. Ndërsa shpjegon se ka njohuritë dhe përvojën e duhur për të drejtuar një klub të madh si Tirana.
“Kam stërvitur skuadrën më të madhe në Kenia dhe u largova pasi fituam Superkupën dhe më pas një turne javën e kaluar. Kur merr drejtimin e klubit më të madh në një vend vjen me mendime shumë pozitive. Kam fituar shumë përvojë si trajner për të drejtuar një skuadër të këtij niveli. Nuk frikësohem nga sfida. Kam qenë pjesë e ekipeve të mëdha si futbollist dhe trajner. Nuk e kam problem të punoj nën presion. Nuk besoj se trajneri që do të drejtojë Tirana duhet të ketë 20 vite karriere”, u shpreh ai.
Për një skuadrën më të titulluar në Shqipëri, kthimi në Kategorinë Superiore, mbetet detyrim, por Ze Maria sheh përtej këtij synimi.
“Objektivi im është ai që ka edhe klubi: ta kthejmë skuadrën aty ku duhet të jetë. Duhet të kalojmë një raund në Europa League dhe t’i rritim profesionalisht lojtarët e rinj me ata me më shumë eksperiencë. Duhet t’i japim përparësi futbollistëve të akademisë që t’i nderojnë këto ngjyra në superiore”.
Braziliani vjen te Tirana me një përgatitës atletik dhe një ndihmëstrajner, ndërsa për sa i përket merkatos sqaroi se më parë duhet të kuptojë se në cilat pozicione ekipi ka nevojë për përforcime.
