Anijet ukrainase kanë rifilluar të qarkullojnë përmes Ngushticës së Kerçit drejt dy porteve të rëndësishme të Ukrainës. Rifillimi i lëvizjes vjen nëntë ditë pasi Rusia kishte hapur zjarr ndaj tri anijeve të shtetit fqinj. Lajmin e mirë e dha një ministër ukrainas i cili sqaroi se portet e Mariupolit dhe Berdyanskit janë zhbllokuar pjesërisht.
Me sa duket presidenti i Rusisë, Vladimir Putin është detyruar që të tërhiqet deklaratat e tij për të mos lëshuar pe ndaj Ukrainës. Akoma nuk ka ndonjë informacion se çfarë i detyroi Putin të tërhiqet, por presioni ndërkombëtar ishte shumë i fortë.
Rusia kishte arrestuar 24 marinarë ukrainasë më 25 nëntor në përleshjen e parë të drejtpërdrejtë mes dy shteteve që nga viti 2014. Anijet ukrainase ishin nisur drejt portit të Mariupolit, por më vonë u zunë në ujëra ndërkombëtare. Para këtij incidenti, Ukraina e kishte akuzuar Rusinë për pengimin e anijeve të mallrave që hynin dhe dilnin nga dy portet e rëndësishme, të cilat ndodhen në Detin Azov, ujërat e të cilit i takojnë Rusisë dhe Ukrainës.
Rusia edhe më herët e kishte nisur kontrollimin e anijeve ukrainase, ndërkaq Ukraina e kishte akuzuar Rusinë se po i bën bllokadë ekonomike. Ministri ukrainas i infrastrukturës tha se anijet e kanë rinisur qarkullimin nëpër ngushticë, por kontrollet ruse janë duke u bërë si më parë. Rusia nuk kishte bazë ligjore për ta zbatuar një bllokadë të plotë, prandaj duket se i është rikthyer procedurave që i ka zbatuar edhe para 25 nëntorit, shkruan “BBC”
