Udhëtimi dhe shfrytëzimi për kalim nëpërmjet autostradave pothuajse në çdo shtet paguhet, por diferenca qëndron tek çmimi. Duke filluar nga data 17 shtator, çdo drejtues mjeti që do të kalojë në ‘Rrugën e Kombit’, do të paguajë taksën e kalimit. Çdo përdorues i kësaj rruge do të paguajë 660 lekë për çdo kalim.
Sakaq, për banorët e qarkut të Kukësit do të aplikohet tarifa prej 100 lekë. Pagesa nuk do të bëhet më në monedhën europiane dhe banorët e zonës do ta kenë të reduktuar këtë taksë kalimi.
Tarifa e kalimit në rrugën Durrës-Kukës u vendos për herë të parë në fillim të muajit prill, në masën 5 euro për një kalim, ose 10 euro vajtje-ardhje. Në kontratën e koncesionit parashikohej që për banorët e zonës të kishte lehtësira, por vetëm 6 muaj pas hyrjes në fuqi të taksës derisa të identifikoheshin përdoruesit e shpeshtë. Kjo çoi në zemërimin e qytetarëve të Kukësit, të cilët dy ditë pas vendosjes së taksës, protestuan duke djegur pikën e kalimit me pagesë.
