Për plot 180 minuta, ministri Jashtëm Ditmir Bushati ka zhvilluar një takim me homologun grek Nikos Kotziaz, i cili vjen në Tiranë plot dy javë pasi Presidenti Meta firmosi autorizimin për nisjen e negociatave mes dy vendeve.
Takimi është zhvilluar kokë më kokë, por i vetmi informacion që vjen zyrtarisht thotë se është zhvilluar në një klimë pozitive e bashkëpunuese, ku është folur për rezultatet e arritura deri tani nga bisedimet dypalëshe si dhe për hapat e mëtejshme.
Një prej hapave që pritet të hidhen edhe që mban peng arritjen e një marrëveshje dypalëshe, është marrëveshja e detit. Ndërkohë ende nuk ka asnjë datë konkrete për takimin e nivelit të lartë mes dy Kryeministrave që ishte lajmëruar se do të zhvillohej gjatë vizitës së Kryeministrit Tsipras në Tiranë.
Por ministri i Jashtëm Ditmir Bushati, gjatë një deklarate për mediat bërë përpara takimit me Kotzias tha se palët janë duke diskutuar veç të tjerash edhe për arritjen e një date konkrete për këtë takim.
