Nga foltorja e Kuvendit, kreu demokrat Lulzim Basha lëshoi një lumë akuzash në drejtim të qeverisë ‘Rama’. Ai tha se rivali i tij politik, Edi Rama, ka lidhje me kriminelë, dhe kjo vetëm për faktin, sipas tij, për të marrë pushtetin.
Po kështu, Basha i kërkoi kryeparlamentarit Gramoz Ruçi, që të vinte rregull në sallën e Kuvendit, pasi deputetët e PS-së po bënin zhurmë.
“Karagjozllëqet i marrin nga shefi”, tha më tej ai.
Në vazhdën e akuzave, kryedemokrati Basha tha se kjo aleancë me krimin, ka falimentuar shtetin. “Kjo aleancë e Ramës me krimin, është faktori kryesor i falimentimit ekonomik e social”, u shpreh Basha.
Ai shtoi më tej: “S’do ketë sukses asnjë reformë, pa e ndarë politikën nga krimi. Këta kanë një qëllim; të paralizojnë institucionet e drejtësisë, për të shkatërruar dosjet e tyre hetimore”.
