Bashkia e Tiranës ka vendosur të rrisë edhe taksën e pastrim-gjelbërimit, duke e futur në parashikimet e të ardhurave në buxhetin e viteve 2020-2022.
Kjo rritje është arsyetuar me koston e lartë që i duhet të mbulojë bashkisë për pastrimin e qytetit.
Ndërkohë një tjetër taksë që është menduar të ndryshohet është ajo e infrastrukturës arsimore. Kjo taksë pritet të ulet vetëm për biznesin e vogël me xhiro 0-2 milionë lekë, për të ekuilibruar ngarkesën fiskale. Ky ndryshim pritet të rrisë të ardhurat në arkën e bashkisë, nga 18 miliardë që janë mbledhur këtë vit kjo vlerë pritet të kalojë vlerën e 20 miliardëve.
Transporti zë pjesën madhore të investimeve, 34%. Përveç projekteve infrastrukturore me rrugë të reja e rikonstruksione, modernizimi i transportit publik përmes biletës elektronike është risia në këtë drejtim.
Arsimi do të zërë gjysmën e peshës së shpenzimeve në buxhet që bashkia ka paracaktuar. I vetmi projekt në vazhdim janë 17 shkollat e reja (dhjetë 9-vjeçare dhe 7 të mesme) me financimin e koncesionarit.
Programet për zhvillimin e komunitetit zënë një pjesë të konsiderueshme, 24%, duke parashikuar më shumë hapësira të reja, gjelbërim e ndriçim. Sa i takon strehimit, kthyer në emergjencë tashmë pas tërmeteve, bashkia nuk ka parashikuar buxhet shtesë.
Projektet e reja strategjike ku do të shkojnë paratë e investimeve janë:
- Piramida,
- Kopshti Zoologjik,
- Teatri Kombëtar,
- Tirana Policentrike,
- Kampusi Universitar,
- Pylli orbital,
- Zona e Teknologjisë dhe Zhvillimit Ekonomik,
- Zgjerimi i Lanës,
- Axhenda e gjelbër e qytetit,
- Rruga e Arbrit
- Unazat e Tiranës.
