Partia Demokratike ka vijuar me denoncimet e radhës kundër qeverisë. Deputetja Izmira Ulqinaku, ka denoncuar atë që e quan si afera më e re korruptive e kësaj qeverie.
Sipas saj, kryeministri Edi Rama ka dhënë me koncesion tek klientët e tij, kontrollin e kolaudimit të pompave të karburanteve. Ajo shprehet më tej se ky është një shërbim shtetëror, por qeveria ka vendosur që t’ia kalojë privatit.
Fitimi për koncensionarin llogaritet të jetë rreth 60 milionë euro.
“Qeveria e Edi Ramës ka vendosur të japë me koncesion tek klientët e tij, kontrollin e kolaudimit të pompave të karburanteve. Aktualisht, ky është një shërbim shtetëror, por korrupsioni në qeveri ka vendosur t’ia kalojë atë privatit, që do të vendosë se cilat pompa karburantesh i vjedhin shqiptarët, dhe cilat nuk i vjedhin.
Fitimi për koncensionarin, klient i Edi Ramës llogaritet të jetë rreth 60 milionë euro, që do të paguhen nga shqiptarët, ose tek çmimi, ose tek sasia e karburantit me të cilin do të furnizohen nga pompat e kolaudura nga kompania private.
Kjo është e njejta kompani që ka marrë me koncension shkollat e Tiranës me pronar Gentian Sulën, e njejta kompani për të cilën qeveria shpiku koncension tjetër korruptiv, atë të targave me çip, por që për shkak të presionit të opozitës dhe pakënaqësisë së qytetarëve, qeveria u tërhoq nga ky koncension absurd dhe korruptiv.
Kontrolli i matjes së pompave të naftës për shkak të kritereve të vendosura që tenderi të fitohet vetëm nga kompania e Gentian Sulës, vendos monopolin në treg duke shkatërruar përqëndrimin e ekonomisë në pak duar”, deklaroi deputetja.
