Zbardhen dy raportet që Këshilli i Mandateve dhe Rregullores i ka dërguar Parlamentit të Shqipërisë lidhur me kërkesën e Prokurorisë së Krimeve të Rënda për heqjen e imunitetit dhe arrestimin e deputetit Tahiri.
Raporti i mazhorancës:
Në raportin rekomandues që deputetët e mazhorancës, anëtarë të Këshillit për Rregulloren, Mandatin dhe Imunitetin, i kanë dërguar Kuvendit, thuhet se “nga shqyrtimi i kërkesës së organit të akuzës, relacionit përkatës dhe provave të paraqitura shpjegimeve të dhëna gjatë mbledhjes që realizoi Këshilli, rezultoi qartësisht se nuk ekzistojnë dyshime të arsyeshme dhe të bazuara për të përligjur dhënien e autorizimit për masën e arrestit ndaj deputetit Saimir Tahiri”.
Sipas mazhorancës, “në materialin prej më pak se 5 faqe, por edhe gjatë sqarimeve të dhëna në mbledhjet e Këshillit, organ i akuzës nuk mundi të argumentojë përfshirjen e deputetit Tahiri në veprimtari kundërligjshmërie, dhe nuk paraqiti asnjë indicie, fillim provë apo provë që të krijonte bindjen tonë se ka dyshime të arsyeshme dhe të bazuara për të autorizuar vijimin e procedurave për masën ekstreme të arrestit ndaj deputeti Tahiri”.
Po ashtu, në raport theksohet se Këshilli nuk mund të shqyrtojë provat dhe faktet, gjë që i takon Gjykatës, duke shtuar se Kuvendi nuk mund të cenojë ndarjen e pushteteve.
Raporti Rekomandues i Deputeteve Te Mazhorances by Tirana Today on Scribd
Raporti i opozitës:
Në raportin e plotë prej 22 faqësh, që Partia Demokratike dhe Lëvizja Socialiste për Integrim do të paraqesin nesër në Kuvend, dy partitë opozitare paraqesin argumente se pse Kuvendi duhet të pranojë kërkesën e prokurorisë për hetimin dhe arrestimin e deputetit Saimir Tahiri.
Ndryshe nga mazhoranca, që ka refuzuar arrestimin e Tahirit, anëtarë të Këshillit për Imunitetin të opozitës konkluduan se Kuvendit duhet t’i rekomandohet miratimi i dhënies së autorizimit për “Arrestimin ose heqjen e lirisë, si dhe për të ushtruar kontroll personal dhe të banesave të deputetit Saimir Tahiri.
“4 vjet kishin zhvilluar qetësisht trafikun ndërkombëtar të drogës, për bisedat midis familjarëve Habilaj dhe anëtarëve të grupit të strukturuar kriminal, që dëshmonin për kontakte të shpeshta me deputetin Saimir Tahiri dhe për lidhje të ngushta me të, gjer tek dhënia e dhuratave dhe e shpërblimeve të paligjshme, për vehtën, familjarët dhe partinë politike të tij që t’i përdorte për zgjedhje, si pasojë e krijimit prej tij të mbështetjes dhe lehtësimit për trafikimin ndërkombëtar të narkotikëve.
Po ashtu në raportin e PD- LSI thuhet se vëllezërit Habilaj dhe bashkëpunëtorët e tyre kanë patur lidhje të ngushta me deputetin Saimir Tahiri dhe duke përfituar nga këto lidhje të ngushta dhe përmes shpërblimeve, kanë arritur të bëjnë të mundur, krijimin e kushteve për kultivimin në sasi të konsiderueshme të lëndës narkotike në Shqipëri, transportimin e tyre në mënyrë të organizuar me destinacion jashtë shtetit, me skafe, peshkarexha dhe automjete, nder te tjera makina Audi me targe AA003GB.
Raport Rekomandues i Deputeteve Te Opozites by Tirana Today on Scribd
