I bujshëm ishte lajmi i pak ditëve më parë, ku transferimi i sulmuesit të Milanit, Andre Silva tek Monako, dështoi, kur dukej se gjithçka ishte e kryer. Mediat italiane raportuan se kjo situatë ndodhi, pasi portugezi nuk kishte kaluar vizitat mjekësore, por ditën e sotme, është drejtori i përgjithshëm i klubit nga principate, Oleg Petrov, që zbardh të tjera prapaskena.
Në një intervistë për agjencinë e lajmeve “AFP”, Petrov shprehet se transferimi dështoi vetëm prej termave financiarë. “Transferi i Andre Silvës nuk u bë vetëm prej mosmarrëveshjeve financiare mes nesh dhe Milanit. Nuk është e vërtetë se ka dështuar në vizitat mjekësore. Për momentin, nuk ka negociata të reja në vazhdim. Do të shohim alternativa të tjera”, deklaroi Petrov.
Kështu, Andre Silva nuk ka probleme fizike, dhe trajneri Marko Xhampaolo e ka marrë me vete drejt Kardifit, ku të shtunën do të zhvillojë një ndeshje miqësore me Mançester Junajtid.
