Kryeministri i Maqedonisë, Zoran Zaev do të vizitojë sot Kosovën. Gjatë vizitës së tij në Prishtinë, Zaev do të zhvillojë një sërë takimesh, ndër të cilat me kryeministrin e Kosovës, Ramush Haradinajn, kreun e Kuvendit Kadri Veseli dhe me presidentin Hashim Thaçi.
Pas takimit, dy kryeministrat do të mbajnë një konferencë të përbashkët. Kjo është vizita e parë zyrtare e një kryeministri të Maqedonisë në Kosovë.
Por, a do të bisedohet gjatë takimeve për rastin e Kumanovës?
Dënimi i grupit të çështjes Kumanova në Maqedoni shkaktoi reagime edhe në Kosovë, madje nuk munguan as protestat.
Në njërën nga tubimet familjarëve të të dënuarve në rastin e Kumanovës, Ramush Haradinaj premtoi se do të ndërhynte dhe do i ndihmonte ata, madje tha se për këtë gjë do të diskutonte edhe me kryeministrin maqedonas, Zoran Zaev.
E teksa ky i fundit do të vizitojë sot Kosovën, pritet që mes tyre të flitet edhe për Grupin Kumanova.
Drejtori i zyrës për Informim në Qeverinë e Kosovës, Halil Matoshi ka thënë për lajmi.net se diskutime do të ketë për të gjitha çështjet që i preokupojnë dy shtetet.
“Nesër nuk e di a do të diskutohet, por besoj se diskutim do të ketë gjithsesi për të gjitha temat që i preokupojnë dy shtetet.
Duhet theksuar se qëndrimi i kryeministrit Haradinaj është i qartë sa i përket dënimit të këtij grupi. Kosova dhe qeveria kërkon një rihetim ndërkombëtar, rigjykim të monitoruar ndërkombëtarisht të gjithë ngjarjes. Po ashtu me këtë ide është bashkuar edhe vet kryetari i Kuvendit të Maqedonisë, Talat Xhaferi”, deklaroi Halil Matoshi.
Para pak kohësh, qeveria e Kosovës kishte ndarë 219 mijë euro për familjarët e të dënuarve në rastin Kumanova.
Me rastin e 28 nëntorit në Prishtinë u protestua pikërisht për këtë çështje, ku qytetarët kërkuan angazhim më të madh nga qeveritë në Tiranë dhe Prishtinë.
