Diplomatja amerikane Yuri Kim, ka qenë e pranishme sot në një prej seancave stërvitore në kuadër të “DefenderEurope 21”, në zonën e trajnimit në Bizë. Teksa ka marrë situatën në dorë, ajo nuk i është frikësuar armatimeve, ku dhe ka bërë qitje me armë automatike dhe pistoletë. Ambasadorja e Shteteve të Bashkuara Yuri Kim, Ministri shqiptar i Mbrojtjes, Niko Peleshi, Gjeneral Major Jim Eifert (Garda Kombëtare e Floridës) dhe Brigadieri Jo Chestnutt (Mbretëria e Bashkuar) vizituan Zonën e Trajnimit në Bizë. Aty ku trupat amerikane dhe shqiptare po jetojnë dhe punojnë së bashku gjatë “DefenderEurope21”, stërvitja më e madhe ushtarake në Ballkanin Perëndimor, e cila po zhvillohet në të gjithë Shqipërinë.
Ata ndoqën nga afër ushtrime zjarri, pjesë e Stërvitjes të Përgjigjes së Shpejtë (një nën-stërvitje e Defender 21), ku ushtarë shqiptarë dhe amerikanë kryen trajnime të përbashkëta gatishmërie, për të rritur ndërveprimin e NATO-s dhe për të treguar aftësitë e tyre në parandalimin e konflikteve dhe aftësinë për të mbajtur kombet e sigurta.
“DefenderEurope 21” është stërvitja më e madhe e bërë në Ballkan. Ushtrimi i udhëhequr nga SHBA-ja dhe forcat e NATO-s do të mbledhë gjithsej 28. 000 forca shumëkombëshe nga 26 kombe. Po kryhen operacione gati të njëkohshme në më shumë se 30 zona trajnimi.
