Në fazën paszgjedhore kur kërkohen arsyet e humbjes dhe motivet e fitores, ish-ministri i Drejtësisë nga radhët e LSi-së, Ylli Manjani gjen autorin e vjedhjes së zgjedhjeve.
Në vlerësimin e tij, edhe si jurist, është vet sistemi zgjedhor, “vjedhësi” i zgjedhjeve, edhe pse nuk mohon formën klasike të vjedhjes së tyre.
Në një postim në faqen e tij në FB, Manjani shkruan se, “Janë shitur e janë blerë vota si asnjëherë tjetër më parë. Por vështirë të justifikohet devijimi masiv i vullnetit të zgjedhësve”.
Sipas tij, “sado që u ble vota, prapë nuk mund të quhet faktor determinant në ndryshimin e rezultatit me 10 mandate! Kemi një problem shumë më serioz që lidhet me demokracinë e vërtetë; sistemin zgjedhor”.
“Ky është “hajdudi” më i madh i votave. Ky sistem i jep mandatin qeverisës edhe atij që nuk votohet nga shumica e zgjedhësve. Ky sistem i shndërron zgjedhësit në votues. I ndan ata në zgjedhës me vlerë të lartë dhe të ulët vote! Vota e Kuksianit vlen me pak se e Tiransit apo Durrsakut! Kjo nuk është barazi”,shprehet ai.
“Ky sistem duhet shporrur! Duhet zëvendësuar me një sistem që ka sens, që shton dialogun dhe ul arrogancën” thotë ai, teksa vlerëson se sistemi Proporcional i Personalizuar në vetëm 61 zona zgjedhore dhe një korrektim me lista partish, është ideali. Sipas tij, ky sistem siguron proporcionalitet por edhe konkurrueshmëri të drejtpërdrejtë. Pra populli vendos edhe për deputetin por edhe për partinë,” deklaron Manjani.
