Aventura e Besart Celinës si lojtar i Manchester Cityt duket se ka përfunduar. Futbollisti i kombëtares së Kosovës do të transferohet tek Swansea City dhe sezonin e ardhshëm do të luaj në Championship.
“Sky Sports” mëson se i riu kosovar do ti kushtojë Swanses 5 milionë euro. Celina ka luajtur vetëm katër ndeshje titullarë tek Manchester City dhe sezonin që lamë pas ishte i huazuar tek Ipswichin po në ligën e dytë të Anglisë. Në 35 ndeshje ai arriti të shënonte 7 gola.
Trajneri i Swansea Cityt, Graham Potter, synon ta rikthejë ekipin e tij në Premier League dhe prandaj i është vënë pas Celinës, i cili i ka shfaqur aftësitë e tij në Championship sezonin e kaluar. Tani, sipas “Sky”, ai ia ka arritur qëllimit ta sjellë Celinën në skuadër. Ndërkohë, blerja e Riyad Mahrez nga Pep Guardiola ka bërë që shpresat e Celinës për të qëndruar në City të shuhen.
