Myftiu i Tiranës, Ylli Gurra, teksa ka qenë i ftuar në studion e ‘Report Tv’, ka folur për procesin zgjedhor të Komitetit Shqiptar Mysliman. Gjatë intervistës, ia ka vënë theksin tek procesi, të cilin e ka cilësuar të parregullt, për sa kohë disa kandidatë nuk kanë shpalosur asnjë ide, por kanë paraqitur kandidaturën e tyre në ditën e fundit të aplikimit.
Gurra u shpreh se në vend ka nevojë për komunikim, dhe se mungesa e tij është faturë në kurriz të popullit. Për të, këto zgjedhje duhet të jenë edhe një shembull për politikën. Po kështu ai shtoi se për të kandiduar për këtë post duhet të jesh një myfti me përvojë. Ndër të tjera, Ylli Gurra solli në fokus edhe mungesën e komunikimit, duke e demonstruar edhe me dorëzimin e dokumenteve në ditët e fundit.
“Këto zgjedhje në gjykimin tim duhet të jenë një shembull edhe për politikën. Zgjedhjet për kreun tonë duhet të jenë pasqyra jonë më e sinqertë. Për të kandiduar për këtë post duhet të jesh një myfti me bagazh dhe përvojë, por këta kandidatë kanë detyrimin të komunikojnë.
Mungesa e komunikimit është faturë ndaj këtij kombi. Do të ishte fisnike që komunikimi ynë të jetë jo vetëm i hapur, por edhe i sinqertë. Për këtë do duhej një periudhë kohore dhe jo dorëzimi i dokumenteve në ditën e fundit.
Zgjedhjet në KMSH nuk janë zgjedhje të ndonjë shoqate çfarëdo, por në një institucion të kombit. Në këtë situatë të tillë kandidatët duhet të kenë kohë për të shpalosur idetë e tyre.
KMSH duhet të jetë i pavarur në lirinë e besimit dhe përgjegjësisë”, deklaroi Gurra.
