Ministri i Brendshëm, Fatmir Xhafaj, gjatë aktivitetit “Forca e ligjit në veprim: arritje dhe sfida”, të mbajtur paraditen e së enjtes, deklaroi se, “politika po sulmon me papërgjegjshmëri politike Policinë e Shtetit”. “Lufta për një shoqëri më të sigurtë nuk është e thjeshtë dhe më vjen keq që politika, me papërgjegjshmëri politike, sulmon Policinë e Shtetit”, theksoi Xhafaj në fjalën e tij.
Ministri shtoi se “është e papranueshme që policia të konsiderohet forca e krimit apo narkopolicia”.
“Nuk e prisnim që një pjesë e politikës të reagonte kështu ndaj rezultateve pozitive në luftën kundër krimit. Akuzat ndaj policisë janë kundërproduktive”, nënvizoi Xhafaj.
Më tej gjatë fjalës së tij, ministri tha se në një vit punë janë arritur rezultate shumë të mira edhe pse ka ende për të bërë. Sipas tij Shqipëria ka dalë nga harta e vende të kanabisit.
“Siguria dhe rendi publik janë prioritetet kyçe. Puna për të ngritur shërbimin e Policisë së Shteti në nivelin ku është sot, serioziteti, përkushtimi ka sjellë rezultat të spikatura dhe të njohura tashmë kundër krimit të organizuar. Nxjerrja e Shqipërisë nga harta e vende të kanabisit, numri i veprave penale janë në nivele më të ulëta historike, përfshi këtu numrin e vrasjeve dhe aksidenteve. Operacioni Forca e Ligjit është një çështje e certifikuar. Në saj të saj janë goditur disa grupe kriminale dhe disa të tjera jenë në hetim e sipër. Për të arritur këto rezultate është dashur shumë punë. Jemi krenarë që në zbatim të ligjit ja keme dalë. Gjithçka është para së gjithash meritë e punës së bashkëpunëtorëve të mi, burra dhe gra, djem dhe vajza që kanë punuar orar dhe pa orar”.
Xhafaj tha se Policia e Shtetit ka hartuar një draft për masat që do të ndërmerren deri në Qershor të vitit 2019 në kuadër të luftës së krimit të organizuar dhe falë bashkëpunimit me agjencitë e huaja shumë grupe kriminale janë goditur.
“Prej kohësh po bashkëpunojmë me agjenci të rëndësishme si FBI, Interopl, etj për të goditur grupet kriminale. Vlerësimet e pasqyruara në datë 28 Qershor janë pozitive dhe na inkurajojnë dhe rekomandimet janë për të vazhduar në rrugën e nisur. Ne jemi duke i lexuar me shumë vëmendje dhe përgjegjshmëri. Kemi përgatitur një plan të posaçëm veprimi deri në Qershor të vitit 2019. Ky dokument është një draft dhe do të bëhet i plotë duke marrë parasysh dhe mendimet tuaja. Lufta kundër krimit të angazhuar kërkon angazhim, punë, përkushtim dhe sakrifica njerëzore”, u shpreh Xhafaj.
