Ministri i Brendshëm, Fatmir Xhafaj tha se ka pasur policë të implikuar në kultivimin e kanabisit. Në një takim me strukturat vendore të policisë në Vlorë, Xhafaj është shprehur disi i pakënaqur me punën e policisë në këtë qytet teksa tha se disa ngjarje të rënda në këtë qytet janë ende pa autor. Ministri u shoqëruar nga Drejtori i Policisë së Shtetit, Ardi Veliu.
‘Së pari duhet të bëj një nënvizim të nevojshëm brenda radhës së policisë ka punonjës policie që në vlerësimin tim janë njerëz me integritet. Por ka edhe disa kolegë të cilët nuk bëjnë shumicën për fat të mirë që kanë qenë të implikuar në kultivimin e kanabizit. Po ky është një proces që ne po e trajtojmë hap pas hapi. Ky është një proces që po e bën drejtoria e përgjithshme e Policisë. Duhet t’i ndalojmë këto fenomene brenda radhës së policisë. Ka ende disa ngjarje të rënda kriminale në këtë qytet që janë ende pa autor. Janë disa vrasje të pazbuluara, situatë e cila nuk gjendet në disa qytete të tjera, ku ngjarje të tilla janë përballuar shumë mirë nga drejtoritë vendore të policisë,” tha Xhafaj.
Gjithashtu ministri Fatmir Xhafaj tha se do të ketë një organizim të ri dhe të mirëpërcaktuar të policisë në këtë qytet.
“Do të ketë një organizim të ri dhe të mirëpërcaktuar të policisë. Kemi hyrë në një fazë tjetër, atë të goditjes së grupeve të strukturuara kriminale. Nuk jemi shumë të kënaqur me punën e strukturave të Policisë së Vlorës”, deklaroi Xhafaj.
