Me një postim në Facebook, Mark Zuckerberg ka publikuar funksionin e ri WhatsApp, i cili do të dalë në tregun global të hënën e ardhshme. Kjo është mundësia për të hyrë në telefonata dhe thirrjet me video edhe pasi këto të kenë nisur,pra nëse biseda është ende në progres.
Një menu e re e aplikacionit do t’ju lejojë të futni në telefonatë apo thirrje me video për të marrë pjesë së bashku me përdoruesit e tjerë, që janë tashmë të futur në telefonatë. Deri tani, mënyra e vetme për të marrë pjesë në një thirrje, vetëm audio ose edhe video, është t’i përgjigjeni njoftimit që shfaqet në ekran të plotë. Pas kësaj, nuk ka asnjë metodë tjetër për të hyrë në një moment të dytë.
Së bashku me këtë risi, WhatsApp do t’ju lejojë të shihni se kush është brenda bisedës, si dhe përdoruesit e ftuar, por që nuk janë futur ende. Ashtu si thirrjet e tjera me zë dhe video, këto gjithashtu do të jenë të koduara, duke ruajtur privatësinë e pjesëmarrësve.
Me këtë lëvizje, WhatsApp po shtyn drejt shërbimeve të ngjashme të përparuara të komunikimit, të tilla si Zoom dhe Teams, që erdhën në rritje në muajt e pandemisë si pasojë e punës dhe shkollës në distancë. Nuk është ende e qartë nëse funksionaliteti i hyrjes në telefonatat në zhvillim do të jetë aktiv vetëm për smartphone apo edhe për aplikacionin përmes desktopit, i cili në javët e fundit ka marrë një azhurnim për thirrjet pritëse dhe thirrjet video, të kaluara më parë vetëm në versionin celular.
