Përfaqësuesi i Partisë Demokratike, Ivi Kaso ka sqaruar vendimin e Gjykatës së Apelit e cila ka pranuar ankimimin e Enkelejd Alibeaj, ndaj vendimit të gjyqtarit Agron Zhukri për njohjen e statutit të 11 Dhjetorit. Sot Gjykata e Apelit ka njoftuar se është marrë në shqyrtim statuti i miratuar në Kuvendin e 11 Dhjetorit. “Apeli” ka pranuar ankimin e Enkelejd Alibeajt ndaj vendimit për njohjen e statutit të 11 Dhjetorit nga gjyqtari Agron Zhukri. Alibeaj kërkon prishjen e vendimit të marrë nga gjyqtari, ose shqyrtimin me një tjetër trupë gjykuese.
Kaso tha se Gjykata e Apelit ka vendosur që ta bëjë pjesë të dosjes ankimin e Alibeajt, por nuk ka vendosur që të prishë vendimin e dhënë nga Zhukri, dhe ky është në fuqi.
“Dua të sqaroj se ndryshe nga sa është raportuar, gjykata dhe aq më pak Gjykata e Apelit nuk kanë vendosur prishjen e këtij vendimi, që do të thotë se vendimi i gjyqtarit Zhukri dhe vendimi që regjistron Kuvendin e 11 Dhjetorit është i ligjshëm dhe është një vendim që është akoma në fuqi.
Është pranuar vetëm mundësia që ankimi i paraqitur nga një palë që pretendon të përfaqësojë PD, të bëhet pjesë e dosjes dhe të shkojë në Apel. Kjo siç e kishim paralajmëruar në kundërshtim me ligjin, faktet, provat që gjenden në dosjen gjyqësore, mbi të gjitha me dhjetëra qëndrime që ka mbajtur vetë Gjykata e Tiranës në raste analoge dhe po e njëjta gjyqtare edhe në rastin e shqyrtimit të problematikave të regjistrimit të PD-së.
Ka shumë arsye ligjore të cilat një pjesë i kemi bërë me dije për publikun dhe një pjesë nuk i kemi ndarë ende me publikun, të cilat do t’ia pamundësonin gjykatës futjen në proces në këtë fazë të një pale që pretendon se përfaqëson PD-në”.
Sipas Kasos, vetëm Komisioni i Rithemelimit mund të përfaqësojë PD në mënyrë të ligjshme, dhe kjo duhej njohur nga gjykata. Prandaj shtoi se ankimi i Alibeajt nuk përmbush asnjë nga kriteret e parashikuara në ligj.
“Konkretisht personi që ka paraqitur ankimin dhe këdo që ai përfaqëson, nuk është palë në kuptim të ligjit. Nuk është as përfaqësues legjitim i ndonjë pale në procesin e shqyrtimit të kërkesës”, tha Kaso.
