Arsen Muskurti, autori i vrasjes së vëllait dhe të kunatës së tij, para togave të zeza ka deklaruar se armën e krimit e ka pasur me leje. Ndër të tjera ka zbuluar se ndaj vëllait dhe kunatës ka barë 7 kallëzime penale.
“Armën e kam patur me leje. Kam bërë 7 kallëzime për vëllain dhe kunatën, të fundit e bëra ditën e vrasjes”, mësohet të kenë thënë Muskurti gjatë seancës.
Avokati kërkoi “arrest në burg” 30 ditë për Arsen Muskurtin, sipas të cilit, klienti i tij vuan nga probleme të shëndetit mendor dhe për këtë merr mjekim. Sipas avokatit, gjendja psikologjike e tij është e rëndë dhe merr mjekim. Po kështu tha se që nga 2018, Arsen Muskurti kishte probleme me vëllain, aty ka filluar edhe mjekimin.
“Më ka kërkuar mua që ta dorëzoj. Unë kërkova masë sigurie 30 ditë, pasi gjendja psikologjike e tij është e jashtëzakonshme, merr mjekim. Ai ka kryer 7 kallëzime penale ndaj të ndjerit dhe të ndjerës. Kishte që nga 2018 që kishte probleme me vëllain, aty ka filluar edhe mjekimin. Nuk është arratisur, por ka dashur të dorëzohet. Arma është me leje”, u shpreh avokati mbrojtës i Arsen Muskurtit.
Arsen Muskurti 38 vjeç është lënë në arrest në burg nga Gjykata e Tiranës, pasi akuzohet për vrasjen e vëllait dhe kunatës së tij, Alban dhe Nora Muskurti, përkatësisht 44 dhe 33 vjeç.
Avokati i të pandehurit tha për gazetarët se Arsen Muskurti nuk ka tentuar të largohet, por u vetëdorëzua në polici dhe nuk u arrestua nga policia sikurse u deklarua.
38-vjeçari Arsen Muskurti qëlloi me pistoletë vëllain dhe kunatën e tij duke i lënë të vdekur. Pas vrasjes, ai u largua i qetë për t’u arrestuar disa orë më vonë.
