Autori i vrasjes së 64-vjeçares Fatime Suli, shtetasi Fetah Mara, ka pranuar autorësinë përballë trupit gjykues. Ai ka shprehur pendesën për krimin që kishte kryer, por mohoi pretendimet se kishte tentuar përdhunimin e Sulit. Ai ka dëshmuar se rrobat i kanë rënë viktimës, duke e tërhequr zvarrë. Tashmë i mbetet ekspertizës mjekoligjore, që të zbulojë nëse ka pasur apo jo abuzim me të ndjerën.
Gjykata e Shkallës së Parë në Berat dha ditën e sotme masën e sigurisë “arrest me burg” për Marën, i cili mbyti dhe më pas tentoi të fshihte trupin e komshies së tij, pas një sherri për motive të dobëta.
Ngjarja e rëndë ndodhi mbrëmjen e 20 janarit në lagjen “Havaleas” në fshatin Kozare. 63-vjeçarja Fatime Suli u gjet e vdekur në një kanal, gjysmë e zhveshur dhe e mbuluar me gjethe. Familjarët e saj e kishin kërkuar prej disa orësh, dhe pasi nuk e kishin gjetur kishin njoftuar për ndihmë policinë.
Vetëm pas rreth 1-orë kërkimesh, 63-vjeçarja u gjet në një kanal, rreth 1 km larg banesës saj. Viktima Fatime Suli u transportua drejt Morgut të Spitalit Rajonal Berat, ku pas kryerjes së autopsisë mjekoligjore, rezultoi se shkaku i vdekjes ishte asfiksimi nga mbytja me duar.
Konfirmimi i vrasjes së gruas vuri në lëvizje policinë e Beratit, për të identifikuar dhe arrestuar autorin e kësaj ngjarje të rëndë.
