Ish-Presidenti Meta ishte sot në një vizitë për ngushëllim në familjen Avdia në Tiranë, ku bëri përgjegjës shtetin për papërgjegjshmëri, ndërsa theksoi se ajo është një vrasje e paralajmëruar. Kryetari i Partisë së Lirisë, Ilir Meta tha se ngjarja mund te ishte parandaluar, pasi ka nje legjislacion për sigurinë në plazhe, i cili nuk është respektuar në elementë të tij.
“Tepër tronditëse për çdo familje dhe çdo prind, aq më tepër për familjen Avdia, për babain që e përjetoi atë tmerr aq pranë, për vëllain e vogël, për të gjithë. Për gjyshin, i cili mezi e kishte pritur mbesën që ajo e kishte përmirësuar gjuhën shqipe. Është një rast i pangushëllueshëm. Jam i impresionuar nga forca dhe karakteri i kësaj familje.
Ishte një tragjedi që nuk ka justifikim nga askush. Jo vetëm nga autori i papërgjegjshëm, por edhe nga shteti, qeveria dhe bashkia, pasi ekziston një legjislacion për sigurinë në plazhe, i cili nuk është respektuar në elementë të tij.
Është një vrasje e paralajmëruar sepse kanë ndodhur raste të tilla edhe më parë. Para pak kohësh kanë ndodhur plagosje, që për fat të mire, pa pasoja në vdekje dhe askush nuk e ka vënë ujin në zjarr. Një papërgjegjshmëri totale. Në një moment duhet të shfaqet pendesa, por edhe marrja e vendimeve të qarta, në të njëjtën moment na shpallet se Shqipëria ka qenë sivijet e para në rajon sa i takon sigurisë në plazhe dhe turizmit. Nuk ka tallje dhe fyerje më të madhe për popullin shqiptar”.
