Enderis Doda, i akuzuar për vrasjen e shokut të tij, Petrit Biba në Pukë, ka refuzuar të flasë për ngjarjen e rëndë në gjyq.
25-vjeçari u dorëzua në polici dy ditë pas ngjarjes, ku Biba mbeti i vrarë me armë në fshatin Vrith të Pukës. Dy të rinjtë punonin në një hidrocentral që është ende në ndërtim. Të rinjtë jetonin në një banesë të përbashkët, ku dyshohet se ndërsa po luanin me një armë të tipi pistoletë që e mbanin pa leje, mbeti i vdekur 30-vjeçari nga Puka.
Doda ka qenë i shokuar para trupit gjykues, ndërsa ka thënë: “Nuk dua ta besoj, nuk jam i gatshëm të flas për çfarë ka ndodhur. Veçse i kërkoj falje familjes”.
Në bazë të deklarimeve që Doda ka dhënë në Polici, mendohet se gjithçka ka ardhur nga pakujdesia. Ai ka treguar se me viktimën kanë qenë miq të ngushtë dhe në momentin e ngjarjes kanë qenë duke luajtur me armën, e cila për fat të keq, është shkrepur aksidentalisht.
Dy djemtë punonin në një hidrocentral që po ndërtohej në fshatin Vrith. Pas ngjarjes, Doda u fsheh në pyllin e fshatit, pasi ka deklaruar se ka qenë në gjendje të rënduar psikologjike e më pas, me një makinë të rastit ka shkuar në Policinë e Shkodrës, ku u vetëdorëzua.
