Gjykata e Përmetit ka zhvilluar një seancë për të rivlerësuar gjendjen mendore të ish-komandos Alban Voda. Ky i fundit, i preu kokën fqinjit të tij para dy vitesh në fshatin Uji i Mirë, në Këlcyrë.
Voda po kryen dënimin në spitalin e burgut të Zaharisë në Krujë, ku mbahet në kushte të veçanta dhe në trajtim mjekësor. Familjarët e viktimës hedhin dyshime që autori i krimit mund të lirohet nga burgu, duke e shpallur person me probleme mendore.
Gjatë marrjes në pyetje, Voda kishte shfaqur halucinacione. Në seancën e parë gjyqësore, deklaroi se Hoxha kishte dashur ta mbyste para disa vitesh me një kokërr ulliri. Ndërkohë, në një seancë të dytë, ish-komandoja deklaroi se 66-vjeçari i kishte përdhunuar hallën e tij.
Ai ka shërbyer në Forcat e Armatosura gjatë periudhës 2009-2012, ku ka marrë pjesë në dy misione, në Kabul dhe Herat.
Banorët dëshmuan se Voda ndryshoi sjellje pas kthimit nga Ushtria, duke ndërprerë komunikimin.
