Të tjera detaje kanë dalë lidhur me ngjarjen që tronditi ditën e djeshme Bulqizën, ku një i ri qëlloi për vdekje me thikë shokun e tij.
Sipas policisë, autori i krimit, Fatjon Keta, ka deklaruar para uniformave blu se vrasjen e ka kryer me vetëdije. Mirëpo kjo është dëshmia e tij paraprake, pasi pritet që 22-vjeçari të përgjigjet para organit të akuzës kur të dalë për t’u njohur me masën e sigurisë.
Sakaq, rezulton që Keta nuk ka kartelë shëndetësore, pavarësisht pretendimeve se vuante nga çrregullime të shëndetit mendor.
Pak kohë më parë ai ishte dërguar në spitalin e Shkodrës nga ku është kthyer mbrapsht në shtëpi pasi mjekët i kanë thënë se nuk është në kushtet e shtrimit në spital.
Ndërkohë, pas ngjarjes së rëndë, mësohet se familja e autorit është larguar nga Bulqiza për të shmangur çdo mundësi hakmarrjeje, pasi jetonte në të njëjtën lagje me atë të viktimës.
Keta goditi ditën e djeshme me thikë bashkëmoshatarin e tij, Arlind Pashën, teksa ky i fundit ishte duke ecur në trotuar.
