Zbardhet dëshmia e Bashkim Mekollit, personit që vrau dje me thikë në mënyrë makabre gruan e tij, Demirkë Mekolli.
Çifti jetonte në shtëpi me të atin e Bashkimit, i cili i kishte strehuar për shkak të varfërisë.
Autori i krimit të rëndë nuk është shprehur i penduar për krimin, ndërsa ka dëshmuar se e ka vrarë për shkak se dyshonte se gruaja e tradhtonte.
Mekolli është shprehur se ka qenë xheloz, ndërsa e shoqja nuk i jepte llogari për asgjë, duke shtuar se sherri mes tyre ka nisur që darkën e së shtunës, ndërsa të dielën nuk ka duruar dot duke kryer aktin e rëndë.
“I kërkoja gjithmonë llogari ku shkonte, por ajo s’më përgjigjej siç duhet. Isha xheloz dhe prandaj e vrava. U zgjova në mëngjes dhe u zumë, ajo s’më dëgjonte. Edhe me babain nuk flisja prej kohësh. Sherri me gruan nisi që në darkë dhe nuk durova dot, mora çfarë gjeta para dhe e godita në kokë kur e pashë në oborr. Kaq mbaj mend”, ka deklaruar ai në polici.
