Ndonëse me vendim qeverie, biznesi i lojërave të fatit është mbyllur, ai vijon në shkelje të ligjit e për fat të keq po prodhon viktima. Pista kryesore ku grupi i hetuesve po ndjek për zbardhjen e ekzekutimit mafioz të 26-vjeçarit, Santiagio Malko, në Tiranë, është konflikti për lojërat e fatit.
Referuar materialit të policisë për ngjarjen, ende nuk ka ndonjë person të dyshuar, por pista kryesore e përqendruar krahas të tjerave është edhe ky biznes me të cilin rezulton i përfshirë viktima.
Burimet nga prokuroria bënë të ditur për RTV Ora se emri i tij nuk rezulton të jetë i skeduar, apo ti jetë referuar ndonjëherë organit të akuzës për vëzhgim apo ndjekje si i dyshuar për ngjarje kriminale.
Madje shtohet se roli i tij në ngjarjen e ish-Bllokut nuk ishte aktiv, pra ai ka rezultuar vetëm i pranishëm në të, gjë për të cilën 26-vjeçari ka dhënë sqarime dhe më pas është lënë i lirë.
Vrasës profesionistë
Santiago Malko u ekzekutua në mënyrë mafioze mbrëmjen e së martës. Nga kqyrja e mjetit të përdorur për vrasjen rezulton se kemi të bëjmë me profesionistë, pasi në të nuk ështe gjetur asnjë gjurmë që do i dërgojë drejt identifikimit. Kjo e bën edhe më të vështirë gjetjen e autorëve, e ndërsa në sitë të policisë po shihen lidhjet e tij shoqërore.
Kqyrja e kamerave të sigurisë ka fiksuar dinamikën e ngjarjes, po identifikimi është i vështirë pasi ata kanë qenë të maskuar dhe kanë qëlluar pa dalë fare nga makina.
Ndërkohë 26-vjeçari Santiago Malko, nuk ka patur me vete armë, por vetem celularin i cili është dërguar për tu kqyrur.
