Një ngjarje e rëndë tronditi opinionin publik mëngjesin e sotëm. 35-vjeçarja Violeta Donaj vrau me armë zjarri bashkëshortin, Kujtim Donaj. Krimi ndodhi në tregun e Milotit, ku çifti dilte çdo të diel dhe shiste rroba.
Fqinjët e çiftit zbulojnë për Tirana Today marrëdhënien që çifti ka pasur. Ata thonë së Kujtimi luante bixhoz dhe se që prej fillimit mes tyre ka pasur debate, të cilat shkonin deri në dhunë fizike ndaj Violetës.
“Marrëdhënie e tyre ka qenë abuzive. Ai e rrihte, lekët i linte në bixhoz. Kujtimi nuk ishte njeri i keq, të paktën jo për të tjerët pasi ishte një shok i mirë dhe njeri i respektueshëm. Por, në shtëpi gjithçka ndryshonte. Violeta është 10 vjet më e vogël dhe Kujtimi gjithmonë e ka nënshtruar dhe trajtuar keq.
Vitet e fundit, Violeta kishte vendosur të dilte në treg dhe të shiste rroba dhe të gjitha lekët që ajo fitonte, ky i merrte dhe i harxhonte në bixhoz. Nuk është e vërtetë që ai ishte pijanec, por që luante me lojërat e fatit.
Para disa muajsh, Violeta kishte shkuar në Itali dhe ndihmonte vëllain duke i mbajtur fëmijën. Rrinte tre muaj dhe merrte një shumë të caktuar. Pasi u kthye, lekët që morri i futi në bankë, sepse e dinte që ai ia merrte. I kishte bërë ca lojëra duke e gënjyer dhe arriti t’ia merrte edhe ato që kishte në bankë.
Ka pasur raste që Violeta e ka mbyllur burrin në shtëpi dhe ka ikur për te vjehrrit, pasi ka pasur frikë prej tij. Edhe familjarët e Kujtimit e kanë ditur, që ai ishte problematik. Ajo ka dashur të ndahet disa herë prej tij, por ai e kërcënonte dhe nuk e linte. E rregullonin marrëdhënien për pak kohë, Kujtimi hiqe dorë nga veset. Por, zgjaste pak dhe i rikthehej dhunës dhe bixhozit.”
Ata rrëfejnë për Tirana Today se mbrëmë në darkë çifti pati një zënkë të madhe dhe Violeta u largua për në Lezhë. Dhe se sot në mëngjes ishte ajo që i kërkoi të takoheshin në Milot.
“Violeta është me origjinë nga Lezha dhe mbrëmë në darkë pas një debati që patën, mori makinën, ka një Smart dhe iku për te prindërit. Dhe në mëngjes i tha të sillte rrobat në Milot për të shitur. Violeta kishte më shumë se një javë që ishte nervoze, e tensionuar dhe nuk fliste me asnjë njeri. E shihnim që ishte ndryshe, por nuk e mendonte njeri se gjendja do të shkonte deri në këtë pikë. Por, duket se ajo e ka menduar gjatë gjithë kësaj kohe veprimin që bëri.”
Banorët thonë se vajza e çiftit, e cila është në klasë të tetë, është në gjendje të traumatizuar dhe se po qëndron me prindërit e Kujtimit. Ndërkohë, djali minoren mendohet të jetë në Lezhë, pasi sipas tyre, Vjoleta e mori me vete kur u largua mbrëmjen e të shtunës. TIRANA TODAY
