Një avokat i njohur është qëlluar për vdekje pranë banesës së tij në Amsterdam.
Bëhet fjalë për 44-vjeçarin Derk Wiersum, i cili ishte i angazhuar në një proces të trafikut të drogës. Ishte avokat i një dëshmitari shtetëror në një çështje kundër anëtarëve të një bande të madhe droge, të cilët akuzohen edhe për pesë vrasje të tjera mes viteve 2015 dhe 2017.
Krimi është cilësuar nga policia vendase “brutal”, ndërsa ka shtuar se një i dyshuar i maskuar me kapuç është larguar me këmbë. “Me këtë vrasje brutale, është kapërcyer një kufi i ri: tani edhe njerëzit thjesht duke bërë punën e tyre nuk duken më të sigurt”, tha shefi i policisë Erik Akerboom.
Jan Struis, kryetar i sindikatës së policisë, nënvizoi se krimi i organizuar ka dalë jashtë kontrollit dhe se Holanda është kthyer në një narko-shtet.
