Dy persona janë vënë në pranga dhe dy të tjerë janë shpallur në kërkim, si të dyshuar për vrasjen e dy vëllezërve Bilali në Shkodër.
Policia ka njoftuar sot se ka bërë zbardhjen e vrasjes së dyfishtë, e ndodhur më 30 mars 2019, ku mbetën të vrarë dy vëllezër dhe ka finalizuar operacionin policor te koduar “Livadhe”.
Kështu të arrestuar janë shtetasit, Arsen Stojku, 29 vjeç dhe Myslym Rama, 23 vjeç, lindur dhe banues në fshatin Mjedë. Ata dyshohen për veprën penale “Vrasja me paramendim kryer në bashkëpunim” dhe “Prodhimi dhe mbajtja pa leje e armëve luftarake dhe municionit”.
I dyshuari kryesor si “truri” ekzekutimit të vëllezërve Bilali është Ibrahim Lici. 26-vjeçari nuk është një emër i panjohur për autoritetet. Në vitin 2017, ai u arrestua në një operacion të bujshëm, si pjesë e një bande që vendosnin gjoba ndaj tregtarëve në Shkodër.
Por pak muaj më vonë, Ibrahim Lici i dyshuar nga Prokuroria e Krimeve të Rënda si njëri nga krerët e kësaj bande gjobëvënësish u lirua nga Shkalla e Parë e Krimeve të Rënda.
Në një deklaratë noteriale në atë kohë tregtarët shprehen se grupi i Ibrahim e Muhamet Licit ishin të kontaktuar për të ruajtur tregun, duke qenë se ata ofronin shërbim më të lirë krahasuar me policinë private.
Ngjarja:
Vëllezërit Bilali u qëlluan sapo dolën nga banesa. Pranë trupit të viktimës Astrit Bilali u gjet një pistoletë, me të cilën dyshohet se i ndjeri u kundërpërgjigj me zjarr ndaj atentatorëve.
Sipas policisë, makina tip “Benz” që përdorën ekzekutorët ishte shpallur e vjedhur që nga viti 2018 dhe ishte me targa false. Në automjetin e djegur u gjet edhe arma automatike me të cilën u krye vrasja. Astrit Bilali ishte babai i ish-boksierit Asmer Bilali, i arrestuar si pjesë e grupit kriminal Bajri në Shkodër.
Njoftimi i Policisë:
Në lidhje me zbardhjen e ngjarjes së ndodhur në 30 mars 2019 ku mbetën të vrarë dy vëllezër, nga Drejtoria e Përgjithshme e Policisë së Shtetit u ngrit një grup i posaçëm hetimor në bashkëpunim me DVP Shkodër dhe nën drejtimin e Prokurorisë Shkodër.
Si rezultat i një pune të mirëorganizuar nga ana e DVP Shkodër, në bashkëpunim me Prokurorinë pranë Gjykatës Së Shkallës së Parë Shkodër, me mbështetjen e Drejtorisë së Forcës së Posaçme Operacionale në Policinë e Shtetit, u zhvillua operacioni policor i koduar “Livadhe” duke u finalizuar me ekzekutimi i urdhrave të ndalimit, datë 25.04.2019, të lëshuara nga Prokuroria pranë Gjykatës së Shkallës së Parë Shkodër, për ndalimin e shtetasve:
– A. S., 29 vjeç, lindur dhe banues në fshatin Mjedë, bashkia Vau i Dejës, i dyshuar për veprën penale “Vrasja me paramendim kryer në bashkëpunim” dhe “Prodhimi dhe mbajtja pa leje e armëve luftarake dhe municionit”.
– M. R., 23 vjeç, lindur dhe banues në fshatin Mjedë, bashkia Vau i Dejës, i dyshuar për veprën penale “Vrasja me paramendim kryer në bashkëpunim” dhe “Prodhimi dhe mbajtja pa leje e armëve luftarake dhe municionit”.
U bë shpallja në kërkim e shtetasit I. L., 26 vjeç, si i dyshuari kryesor për veprën penale të vrasjes, si dhe e shtetasit D. B., 29 vjeç, për veprën penale të “Përkrahja të autorit të krimit”. Vijon operacioni për gjetjen dhe kapjen e tyre.
Pas hetimeve intensive të kryera në drejtimin e Prokurorisë Pranë Gjykatës së Shkallës së Parë Shkodër, rezulton se shtetasit e lartpërmendur kanë planifikuar, organizuar dhe kryer në bashkëpunim këtë vrasje.
Si rezultat i punës së vazhdueshme intensive me metodat speciale të hetimit, nga grupi i posaçëm hetimor, u bë sigurimi i provave materiale dhe shkencore, të cilat çuan në dokumentimin ligjor të kësaj ngjarjeje.
Gjatë veprimeve hetimore u bë sekuestrimi i një automjeti, tre aparateve telefonike celulare, të cilët janë përdorur nga autorët gjatë kryerjes së veprimeve të tyre.
Vazhdon puna për hedhjen dritë mbi motivin e kësaj ngjarjeje dhe identifikimin e personave të tjerë të përfshirë.
Materialet i kaluan Prokurorisë pranë Gjykatës së Shkallës së Parë Shkodër, për veprën penale “Vrasja me paramendim kryer në bashkëpunim” dhe “Prodhimi dhe mbajtja pa leje e armëve luftarake dhe municionit”.
