Vrasja e babë e bir më 2012, në pranga Ardian Çapja. Në kërkim i vëllai

Vihet në pranga Adian Çapja. Sipas njoftimit nga Policia e Elbasanit, mësohet se është arrestuar 53-vjeçari Ardian Çapja i cili dyshohet se në bashkëpunim me disa persona të tjerë kanë vrarë me armë zjarri në vitin 2012 Gentian Beqirin dhe Nezir Beqirin, babë e bir. Mësohet gjithashtu se si pasojë e informacioneve të mbledhura dhe hetimeve është shpallur në kërkim për këtë ngjarje edhe i vëllai i tij, Florenc Çapja, 40 vjeç. Sipas urdhërit të Prokurorisë së Elbasanit mësohet se edhe Florenci dyshohet se ka marrë pjesë në ngjarjen kriminale të vitit 2012.

Ndaj vëllezërve Çapja rëndojnë akuzat për  veprat penale “Vrasja në rrethana të tjera cilësuese” kryer në bashkëpunim dhe “Armëmbajtja pa leje”. Gjatë operacionit, në banesën e Ardian Çapjes, policia gjeti dhe sekuestroi në cilësinë e provës materiale një armë zjarri kallashnikov.

Mësohet se operacioni për kapjen e Çapjes u kodua “Krasta 2021” dhe në të kanë marrë pjesë edhe forcat RENEA. 53-vjeçari konsiderohet një person me precedentë të theksuar kriminalë. Në lidhje me këtë ngjarje të rëndë u arrestua më 11 Tetor të vitit të kaluar në Greqi edhe Jorgo Leku. 41-vjeçari, i cili njihet edhe me tre identitete të tjera si Olsi Leka alias Giorgo Lekou alias Jorgo Lekou u vu në pranga nga Interpol Athina pasi ishte shpallur në kërkim nga autoritetet shqiptare si autor i dyshuar i vrasjes së Gentian Beqirit.

Historia e vrasjeve

Gentian Beqiri u vra më 15 Gusht të 2012-ës në banesën e tij në Elbasan teksa qëndronte nën masën e sigurisë “Arrest shtëpie”. Ai ka qenë dënuar si i implikuar në vrasjen e biznesmenit Sokol Çapja, në vitin 2005. Në lidhje vrasjen e Beiqirit është ekstraduar nga Italia vitin e kaluar Etien Cani. Ai ishte shpallur në kërkim si një nga autorët e vrasjes së dyfishtë. Beqiri ruhej nga efektivë të policisë, por autorët përdorën pikërisht Etien Canin për të hyrë brenda, pasi ai ishte shok fëmijërie me viktimën.

Lexo edhe :   Tiranë / Arrestohen në flagrancë 9 shtetas, për vepra të ndryshme penale

Për vrasjen e dyfishtë është arrestuar vitin e kaluar edhe 36-vjeçari Ervis Bardhi, që dyshohet se bashkëpunoi me Canin. Beqiri u qëllua me 4 plumba me një arme me silenciator teksa flinte gjumë në shtratin e tij, ndërsa i ati u dhuna barbarisht nga autorët ndërsa ndërroi jetë edhe për shkak të një infarkti. Beqiri ishte i paralizuar pasi në tentativë për t’i ikur policisë ai ishte hedhur nga një mur i lartë duke pësuar dëmtime të shtyllës kurrizore dhe prej 6 vitesh qëndronte në banesën e tij. Sipas policisë kjo vrasje ishte në vazhdimësinë e një hasmërie të gjatë mes dy fiseve në Elbasan dhe që ka shkaktuar në vite disa të vrarë. Mes viktimave është edhe vëllai i Gentian Beiqirit, Saimir Beqiri, i cili u vra orët e para të mëngjesit të 11 Prillit të 2016-s në Elbasan. Ai u gjet i pajetë në oborrin e një lokali në dalje të qytetit.