Tre kushërinjtë Lika kanë dëshmuar lidhur me ngjarjen e rëndë që ndodhi në Kurbin natën e ndërrimit të viteve, ku u vra 16-vjeçari Klejdi Gjeta nga një plumb qorr.
Alban Lika, 25 vjeç, Ernis Lika, 20 vjeç dhe Arbër Lika, 18 vjeç, u arrestuan dje pasi dyshohet të kenë qëlluar me armë në lagjen Sanxhak, ku u gjet i vrarë Gjeta.
Mësohet se tre kushërinjtë kanë pranuar se kanë udhëtuar me mjetin tip Benz natën e ndërrimit të viteve, ndërsa për të festuar kanë qëlluar me armë në ajër.
“Qëlluam me armë në ajër për të festuar”, kanë pranuar ata. Por, teksa arma ende nuk është gjetur, tre kushërinjtë refuzojnë të tregojnë vendndodhjen e saj.
Burime pranë policisë së Laçit bëjnë me dije për “Balkanweb” se vijojnë kërkimet për armën, pasi vetëm ekspertiza balistike e saj mund të zbardhte ngjarjen.
Më 31 dhjetor Klejdi Gjeta hipi në tarracën e shtëpisë së tij për të parë fishekzjarret, por nuk u kthyer më. Ishin familjarët ata që gjetën të riun me plagë në kokë mbi tarracë, të cilës fatkeqësisht nuk mundi t’i mbijetonte.
