Pavllo Mihali, i ati i 22-vjeçarit që u vra për një karikues, ka folur për ngjarjen e rëndë duke pohuar se e gjitha ka ndodhur për një karikues.
Në një reagim për “Shekullin”, atleti Mihali tregon se si gangsterët i vranë të birin, djalë i vetëm, duke i çarë me thikë aortën.
I ati i të ndjerit thotë se Marvi ishte vetë i dytë në atë sherr dhe nuk ka mundur të shpëtojë nga thika e sulmuesve, që sipas tij ishin të shumtë, 10-15 vetë, ndërsa shton se djali i tij nuk kishte asnjë njohje me sulmuesit e tij.
“E vërteta është sipas organeve të policisë. Për Marvin shkruajnë shokët e vet të shkollës, si djalë model dhe shembullor. Grupet e gangsterëve i ranë me thikë duke i çarë aortën, ata ishin 10-15 veta, kurse djali im ishte vetë i dytë. Marvi nuk i njihte. Një shok i Marvit ja kishte shitur vagabondëve celularin. Shoku thërret Marvin nga lokali. Marvi nuk u përfshi në sherr, 3 grupet erdhën dhe i sulmuan këta të dy. Marvit ja ngulën thikën!”, rrëfen Pavllo Mihali.
22-vjeçari u dërgua menjëherë në Spitalin e Traumës, por nuk mundi t’u mbijetonte plagëve të marra, duke ndërruar jetë.
