Ish-presidenti Bamir Topi ka votuar sot, ndërsa ka dhënë edhe një mesazh të fortë e të rëndësishëm për mbarë shqiptarët.
Në një deklaratë për mediat, Topi tha se duhet një reflektim i votuesve, por edhe i atyre që kanë bojkotuar zgjedhjet, por kryesisht reflektim të politikanëve.
Ish-presidenti deklaroi se duhet një reformë e thellë, ndërsa u fokusua te ndryshimet kushtetuese të 2008-ës, si një dëm i madh që i ka kontribuar krizës së sotme.
“Unë sot bëra detyrën time si qytetar, votova. Jam kundër bojkotit të votimeve. Duhet të ketë një reflektim qytetar të politikanëve, para se të jenë politikanë, janë qytetarë. Duhet reflektim të thellë për çfarë kanë bërë, sot është niveli më i ulët i demokracisë që ne po jetojmë prej shumë vitesh. Nesër qofshin fitimtarë, qofshin njerëz që kanë bojkotuar, duhet t’i thërrasin mendjes dhe për të dalë nga kriza është me rëndësi procesi për reformë të thellë.
Unë jam deklaruar kundër ndryshimeve kushtetuese si dhe e kam parashikuar që do të sillte këtë krizë, sot duhet bërë reflektim. Të gjithë ata që kanë marrë pjesë në votime kanë ushtruar të drejtën e tyre. Politika amerikane është e institucioneve, skema politike ka nevojë të riformatohet dhe Shqipëria kurrsesi s’mund të kthehet në monizëm”, tha ndër të tjera Bamir Topi.
