Avokati i Saimir Tahirit, Maks Haxhia, ka sqaruar vonesën e Gjykatës së Krimeve të Rënda për të dhënë vendimin për ish-ministrin e Brendshëm.
Në një prononcim për emisionin “Open” në Top Channel, avokati tha se përgjigja pritej në orën gjashtë të pasdites.
“Brenda orës 18:00 prisnim shpalljen e vendimit. Kjo vonesë nuk ka shpjegim tjetër veçse se trupi gjykues po shkruan të gjithë vendimin dhe jo vetëm dispozitivin”, u shpreh ai.
Ndërkohë, kur u pyet se çfarë vendimi pret nga gjykata, ai u shpreh se beson se do jepet pafajësi për Tahirin.
“E them me gjithë bindjen se gjykata nuk ka rrugë tjetër veçse të jap vendim pafajësie. Në bashkëpunim me klientin ndamë dhe detyrat. Tahiri bëri përfaqësimin dhe kundërshtimin fakt pas fakti, duke hedhur poshtë të gjithë prezencën e tij në ndihmë të personave të inkriminuar. Unë bëra përfaqësimin nga pikëpamja e interpretimit ligjor, parë në prizmin e konventave ndërkombëtar”, tha ai.
Nga ana tjetër, Haxhia ka sqaruar frazën e thënë nga klienti i tij në gjyq se “dihet kush është shefi i madh i politikës shqiptare”.
“Akuza solli një përgjim midis Habiljave dhe personave të tjerë të inkriminuar. Tahiri me shumë elegancë, i tha akuzës se nuk kanë realizuar detyrën. ‘Jeni të detyruar që të tregoni se kush është shefi i madh. Juve duhet që ta bëni një vërtetim të tillë, të sillni prova.
Unë si shef i madh paskam qenë edhe me zonjën Gjosha në Bruksel, edhe duke ngrënë drekë me bosët e krimit. për më tepër që kam qenë edhe me Ramën duke drekuar. Pra i bie të jetë ai shefi i madh i krimit”, tha avokati Haxhia në emisionin “Top Story”
