Shirat e rrëmbyeshëm kanë mbërthyer gjithë territorin. Shumë qytete dhe fshatra janë tërësisht nën ujë. Situata më e rëndë paraqitet në fshatrat përreth lumit Vjosa, i cili ka dalë nga shtrati që një natë më parë. Një ndër fshatrat e izoluar është dhe Brataj në Vlorë, i cili ka 350 familje.
Policia e Vlorës njofton se për shkak të reshjeve të shumta që vijojnë të bien, aksi rrugor nacional i cili lidh komunën Brataj me fshatrat Kuç, Kallarat dhe Bolenë do të bllokohet dhe nuk do të lejohet kalimi në këtë aks i mjeteve apo i këmbësorëve.
Në këtë aks rrugor mund të shkëputet një pjesë e shpatit të malit e cila për pasojë mund të rrezikojë jetët e njerëzve. Shërbimet e Policisë, EC dhe shërbimi i mirëmbajtjes së rrugëve ndodhen tashmë pranë këtij aksi për të qenë në gatishmëri lidhur me çfarë do ndërhyrje që mund të jetë e nevojshme.
Policia u bën thirrje banorëve të këtyre zonave që për arsye sigurie të mos kalojnë në këtë aks.
Ndërsa “Tirana Today”, ka sigurua pamje foto dhe video nga vendngjarja. Pamjet janë filmuar në Brataj në rrugën që lidh këtë fshat me Terbacin dhe Vranishtin.
