Një furgon me 932 kg lëndë narkotike është bllokuar në qytetin e Vlorës. Furgoni i mbushur me Cannabis Sattiva po qarkullonte mbrëmë rreth orës 22:30 në qytet në lagjen “Hajro Çakërri” pranë vendit të quajtur “Kuzum Baba”.
Policët kanë dyshuar dhe e kanë ndaluar atë për ta kontrolluar, duke gjetur të sistemuar 46 pako të formave dhe përmasave të ndryshme të mbështjella me natriban dhe qese transparente, brenda të cilave ishin mbushur me material bimor në formë boçesh, e ngjashme si ajo e llojit Cannabis Sattiva.
Nga peshimi i lëndës narkotike, ka rezultuar se pesha e përgjithshme është prej 932 kilogramë, e cila është sekuestruar në cilësinë e provës materiale bashkë me furgonin tip Mercedes Benz me targë AA 196 AI.
Policia ka shpallur në kërkim shtetasin G.M, si dhe vazhdojnë hetimet për identifikimin dhe kapjen e autorëve të tjerë bashkëpunëtor të implikuar në këtë veprimtari kriminale.
